Caldo de groria

Portada da partitura da obra Caldo de groria

Non se pode perder, este vindeiro sábado 23 de febreiro á una da tarde na Casa de Rosalía, a estrea absoluta da peza musical Caldo de groria, de Loliña Mosquera Souto, arranxada polo mestre Braulio Cao Ledo para coro e banda. Trátase dunha versión musicada do poema de Rosalía "Miña casiña, meu lar", que será interpretado por primeira vez, non podía ser doutro xeito, pola Banda de Música de Padrón e a Coral Polifónica Padronesa.

Loliña Mosquera, compositora da partitura

Braulio Cao dirixindo a Banda de Música de Padrón

Loliña Mosquera, primeira galardoada coa Rosa de Galicia pola Fundación Rosalía, é filla de Xosé Mosquera Pérez, coñecido como O Vello dos Contos e principal impulsor "intelectual" da adquisición da casa da Matanza para transformala nun símbolo da cultura galega, alá polo 1946. Foi a propia Loliña quen fixo chegar a súa partitura manuscrita ó director da banda de Padrón, Braulio Cao, co encargo de que ofrecera a melodía a todos os padroneses. Despois dun intenso traballo, Braulio Cao desenvolveu e adaptou esta partitura, pero tamén a simplificou nalgúns aspectos, pois o seu arranxo foi concebido dende a orixe para ser cantado polo pobo de Padrón e por todos os galegos. Tal foi a encarga que recibiu da súa autora.

O resto, se o programa se cumpre, será historia dende este vindeiro sábado grazas tamén ó entusiasmo e implicación amosados dende o comenzo por Anxo Angueira e a Fundación que patronea. Hai que estar.

A Coral Polifónica Padronesa e a Banda de Música de Padrón 

nunha actuación anterior na Praza de Macías